Lonxevidade e envellecemento

Diálogos sobre lonxevidade e envellecemento

Reflexionamos sobre os aspectos relacionados coa lonxevidade e o envellecemento da man dos maiores expertos en cada campo.

Cales son as causas do envellecemento, como é o envellecemento celular, como cambia o noso sistema inmunitario coa vellez, que podemos facer desde a nutrición, cales son os mellores hábitos saudables, como afrontar dende o punto de vista psicolóxico os cambios relacionados coa idade, como se produce e que podemos facer fronte ao deterioro cognitivo, son exemplos dalgunhas das cuestións que abordaremos. Para iso, en colaboración con Collado Lab e a Sociedad Española de Senescencia Celular, presentamos estes colosquios con grandes especialistas cos que falaremos de xeito accesible e ameno para achegar á sociedade todo este coñecemento tan necesario.

Ir a capítulos

Valoración d@s usuari@s

«É posible revertir o envellecemento? Pode ser o futuro da saúde?» cos doctores Manuel Serrano e Manuel Collado

En que momento da investigación biomédica do envellecemento nos atopamos na actualidade? Son sólidas estas promesas terapéuticas? É o envellecemento unha vída de actuación útil e sensata para abordar os problemas de saúde da nosa sociedade? Non perdas este diálogo entre o doutor Manuel Serrano, do Instituto de Investigación Biomédica de Barcelona, IRB, un dos maiores expertos mundiais neste tipo de investigación, e o doutor Manuel Collado, do SERGAS no Instituto de Investigación Sanitaria de Santiago de Compostela, IDIS.

«Que papel xoga sistema inmunitario no envellecemento? Podemos actuar reforzando as nosas defensas inmunitarias?» coa doutora Mittelbrunn e o doutor Collado

Sóubose recentemente que o deterioro na actividade do sistenma inmunitario co paso do tempo está detrás de moitas das enfermidades que nos aqueixan durante a vellez. A incapacidade para recoñecer e eliminar as células danadas termina por dexenerar o sistema. Pero a contribución do deterioro do sistema inmunitario ao envellecemento parece non deterse aí, senón que incluso xoga un papel activo no envellecemento. Compoñentes do sistema inmunitario envellecidos poderían estar causando o envellecemento do resto do organismo. A nosa relatora, a doutora María Mittelbrunn, foi pioneira no mundo en recoñecer a contribución do sistema inmunitario ao envellecemento. Todo este coñecemento abre unha porta prometedora á posibilidade de retrasar e paliar os efectos do envellecemento actuando sobre o noso sistema inmunitario. Algúns incluso apuntan á posibilidade de revertir en parte o deterioro causado polo envellecemento actuando sobre o sistema inmunitario, reforzándoo e dotándoo dun novo vigo que nos permita defendérmonos do paso do tempo. Abordaremos todas estas e outras cuestións nun diálogo que manterán a doutora María Mittelbrunn, Investigadora Científica do Consello Superior de Investigacións Científicas (CSIC) no Centro de Biología Molecular (Madrid), e o doutor Manuel Collado, tamén investigador científico do CSIC no CiMUS da USC e membro do Instituto de Investigación Sanitaria de Santiago de Compostela, IDIS.

Diálogos sobre lonxevidade e envellecemento: Myriam Gorospe e Manuel Collado

O noso novo diálogo sobre lonxevidade e envellecemento terá como protagonista á doutora Myriam Gorospe, unha investigadora española que desenvolviu a súa carreira científica nos laboratorios do Instituto Nacional sobre Envellecemento (INA) dos Institutos Nacionais da Saúde (NIH) dos Estados unidos. No NIA, Myriam traballou en moi diversos aspectos relacionados cun mellor entendemento de como e por que envellecemos, e que podes facer para ter un envellecemento saudable. Afondaremos nestes asuntos desde a mirada da experiencia e os descubrimentos de Myriam Gorospe para acercármonos a que coñecementos nos ofrece a ciencia do envellecemento e que perspectivas podemos vislumbrar para os vindeiros anos.