Ciclo de charlas «Engadindo vida aos anos» en colaboración coa Sociedad Española de Médicos Generales y de Familia

Impartida por José Carlos Bastida Calvo, coordinador do Grupo de Traballo en Artrose-Osteoporose da SEMG, quen lembra que España conta cunha esperanza de vida das máis altas do mundo. «Envellecer é parte do proceso de vida, polo que debemos prepararnos e aprender uns comportamentos para construír unha vellez con benestar e satisfactoria. Os segredos para un envellecemento positivo correspóndense coas decisións persoais de optar por un estilo de vida saudable», subliña. Para o doutor Bastida «é importante desenvolver e manter habilidades funcionais que proporcionen benestar nesta etapa vital. Neste aspecto inflúen múltiples aspectos como as actividades cognitivas, estar ocupados e sentirse útiles para a sociedade, o exercicio físico, a dieta, someterse a exames de saúde regulares, limitar os hábitos tóxicos ou manter un peso saudable e unha boa sexualidade».

Charla dedicada a mostrar as diferenzas entre o envellecemento normal, a deterioración cognitiva leve e a demencia. Desde hai dous anos, o Grupo de Neuroloxía da SEMG colabora como integrante da Rede de Axentes Activos participando en actividades formativas da Confederación Española de Asociacións de Familiares de Alzhéimer (CEAFA), cuxo representante local é a Asociación de Familiares de Alzhéimer Coruña (AFACO). No marco desa colaboración, o doutor Freire expoñerá que son os cribados de trastornos da memoria, os Test Cognitivos Breves (TCB) e como previr da deterioración cognitiva leve.

Charla sobre a dor emocional da man da doutora Juana Sánchez Jiménez, coordinadora do Grupo de Traballo en Dor e Coidados Paliativos da SEMG. Segundo subliña a doutora Sánchez, «no noso cerebro non hai diferenzas entre dor física e dor emocional, por iso é importante analizar as súas causas e síntomas, posicionar a dor emocional ao mesmo nivel que a dor física, dar recursos para recoñecela, abordala e tratala adecuadamente».

Charla sobre saúde mental e o envellecemento a cargo do doutor Antonio Torres, coordinador do Grupo de Traballo en Saúde Mental de SEMG. «Existe unha corrente social de achacar a maior parte dos problemas das persoas maiores ao mero feito de envellecer. Sen descartar os aspectos fisiolóxicos naturais, na área da saúde mental hai moitos mitos e estigmas que convén descartar», destaca Torres. Falarase do vellismo, os seus mitos e estigmas; do insomnio, a depresión na persoa maior e as súas peculiaridades; a ansiedade e a preocupación, así como do afrontamento, convivencia e superación de conflitos en idades avanzadas.