Festival Ikfem 2020 - Concerto dixital de Pablo Lesuit

Pablo Lesuit é un músico multi- instrumentista, cantante e compositor galego que destaca na nova escena da canción iberoamericana polo seu estilo persoal e independente. A música de Pablo non entende de fronteiras ou etiquetas. Libre, viaxa por intensas paisaxes nos que a poesía das súas letras combínase con grandes doses de percusión, guitarras e samplers. Nos últimos anos colaborou en gravacións e concertos con artistas como Jorge Drexler, Eladio y los Seres Queridos ou Esmeralda Escalante de Aínda Dúo, e participou en grandes festivais de España e Latinoamérica. A comezos de 2017, finalizando a xira do seu anterior álbum, Tiempo, realiza unha serie de concertos por Uruguai e Arxentina. Cando chega ao encontro de músicos Serenadas en La Paloma, na costa de Uruguai, e fascinado polo que atopa, decide cambiar de rumbo. Cancela as datas de gravación do seu novo disco en Madrid, o seu regreso a España e comeza unha viaxe de exploración musical e persoal. Acompañado da súa guitarra, un computador e un micrófono emprende un roteiro no que vai realizando gravacións con músicos que atopa polo camiño. Así é como comeza a gravación itinerante do seu novo disco, editado por Esmerarte e ONErpm.