Coloquio 'Quino: Mafalda, o seu creador e o seu mundo'

Encontro ao redor da figura de Quino e á máis soada das súas creacións: Mafalda. Tras a recente desaparición do inmortal historietista, Afundación TV rende unha sentida homenaxe a este artista universal, cuxas reflexións desde o mundo da viñeta serviron de inspiración a xeracións de lectores de todo o mundo.

Para iso, recorre a dous compañeiros de profesión:

Horacio Altuna, artista e historietista arxentino dos anos 70 e amigo de Quino. É recoñecido internacionalmente pola súa obra, entre as que destacan as historietas El Loco Chávez e Las puertitas del Sr. López. Coincidiu como autor con Quino en diversas revistas arxentinas, o que lle permite falar sobre o creador de Mafalda e do mundo editorial no que xurdiu a xenial personaxe desde unha perspectiva única e privilexiada.

Manel Fontdevila é un historietista español, soado polas súas colaboracións na revista El Jueves, onde realizaba as series «Para ti, que eres joven», xunto a Albert Monteys, e «La parejita S.A.», alternándoas con álbums menos comerciais para Glénat. É fan confeso e gran coñecedor da obra de Quino e da súa personaxe Mafalda, á que rende diversas homenaxes na súa propia obra.

O moderador do encontro e terceiro relator será Asier Mensuro, historiador da arte e comisario de exposicións especializado na sétima e novena arte e membro da Asociación de Críticos e Divulgadores de Cómic de España (ACDCómics). Publicou artigos sobre cómic en cabeceiras como ABC ou en revistas como Muy interesante e Descubrir el arte.

Por cortesía de Lumen, editorial da obra de Quino en España, durante esta homenaxe os espectadores poderán gozar dalgunha das tiras de Mafalda.